Ойыл – облыстағы ең алыс аудандардың бірі. Оның үстіне, әлемдік қаржы дағдарысы қапталдасып шыға келді. Дегенмен, ойылдықтар облыстың аудан орталықтарын газдандыру бағытында жүргізіліп жатқан жұмыстың қарқынына қарап, көгілдір отынның игілігін көретін күннің қашық емес екеніне сенім артып келген-ді. Соның сәті де түсті. Шалғайдағы аудан орталығына көгілдір отынды беруге байланысты салтанатты шараға облыс әкімі Бердібек Сапарбаев пен «ҚазТрансГаз Аймақ» АҚ Ақтөбе өндірістік филиалының директоры Аманжол Тәжіғалиев, сондай-ақ аудан тұрғындары қатысты.
«Облыстың елді мекендерін газдандыру және газ тарту жүйелерін жаңғырту» инвестициялық жобасы аясында ұлттық оператор «ҚазТрансГаз» акционерлік қоғамы Ойыл ауылындағы көшеаралық және жеткізуші газ құбырының құрылысын аяқтады. Ауылға газ құбырын тарту аясында 1 автоматтандырылған газ тарту стансасы, 1 блокты газ реттеу пункті, 92 шақырымнан астам жеткізуші газ құбыры, 59 шкафты газ реттеу пункті, 77 шақырым көшеаралық газ құбыры салынды. Енді ауылдың 6 мың тұрғыны, 871 тұрғын үй мен 59 коммуналдық-тұрмыстық және әлеуметтік нысандар табиғи газбен үздіксіз қамтамасыз етіледі. Жалпы, облыс бойынша 2015-2020 жылдарды қамтитын инвестициялық жоба аясында 287 шақырым газ құбыры салынбақ. Ал 2030 жылға қарай өңірді газбен қамту деңгейі 96 пайызға жетеді. Биыл ел Тәуелсіздігінің 25 жылдығы құрметіне біздің облыста барлық аудан орталықтары газдандырылады. Мемлекет басшысы Нұрсұлтан Назарбаевтың тапсырмасына сәйкес халықтың өмір сүру деңгейін арттыру мақсатында барлық іс-шаралар қабылдануда, – деген Бердібек Сапарбаев аудан тұрғындарын көптен күткен қуаныштарымен құттықтады.
«ҚазТрансГаз Аймақ» АҚ Ақтөбе өндірістік филиалының директоры Аманжол Тәжіғалиев Ойылға газ тарту ұлттық оператордың ірі жобаларының бірі екенін жеткізді. Салтанатты шарада сөз алған Ойыл ауданының құрметті азаматы Әнуар Бекмұхамбетов сырттағы әртүрлі саяси-экономикалық дағдарыстарға қарамастан, Елбасы Нұрсұлтан Назарбаев әр уақытта халықтың жағдайына көңіл бөліп келе жатқанын тілге тиек ете келіп, соның нақты көрінісі Ойылға көгілдір отын жеткізілуі екенін атап өтті. Еңбек ардагерлері Ғұсман Жұмбергенұлы мен Тыныштыбай Шалабаев облыс әкімі мен ауданға көгілдір отын жеткізумен айналысқан компания басшылығына ауыл тұрғындары атынан алғысын білдірді.
Бұдан кейін Бердібек Сапарбаев пен Аманжол Тәжіғалиев және ауданның беделді ақсақалдары Ойыл ауылына салтанатты жағдайда газ жіберді. Өңір басшысы бастаған топ алғашқылардың бірі болып көгілдір отынның игілігін көріп отырған Берік Құрмашевтың отбасында болды. Отбасымен аудандағы «Энергосистема» мекемесінде жұмыс жасайтын Беріктің зайыбы Майра от жағу бейнетінен құтылғанын айтып, қуанышын жасырмады. Бұрын қысқа 3 тонна көмір, қи сатып алып келген, оның үстіне қосымша электр қуатымен жылытып келген отбасы бір айда үйді жылытудың өзіне 40-50 мың теңге жұмсайды екен. Енді көгілдір отынның игілігін көріп, қаржы жағынан да үнемге қол жеткізгелі отырғандарын айтты. Өңір басшысы бастаған топ «ҚазТрансГаз Аймақ» компаниясы тегін газ тартып берген әлеуметтік топқа жататын Асқар Мергеновтің отбасында да болды.
Көгілдір отынның келуі аудан экономикасына оң ықпалын тигізері сөзсіз. Бұған дейін Ақтөбеге баратын тас жол салынып, су құбыры тартылған аудан орталығына газ келген соң мұнда шағын және орта бизнестің дамуына берік негіз бар. Енді ауданға қаржылы кәсіпкерлер көптеп келе бастайды, туризмнің дамуына ықпал етеді деген үміт оянды.
Сатыбалды СӘУІРБАЙ,
«Егемен Қазақстан» Ақтөбе облысы,
Ойыл ауданы
