«Интергаз Орталық Азия» АҚ Орталық аппаратында «Жер сағаты» халықаралық экологиялық акциясына орайластырылған ағартушылық іс-шара өтті.          Іс-шараға компанияның барлық өндірістік бөлімшелерінің қызметкерлері бейнеконференция байланысы режимінде қатысты.

         Кездесу аясында қызметкерлерге акцияның пайда болу тарихы мен маңызы туралы ақпарат ұсынылды, сондай-ақ экологиялық жауапты мінез-құлықты қалыптастыру мәселелері қаралды. Күнделікті әдеттердің қоршаған ортаны сақтаудағы және экологияға жағымсыз әсерлерді азайтудағы рөліне ерекше назар аударылды. 

           «Жер сағаты» - Дүниежүзілік жабайы табиғат қорының бастамасымен өткізілетін жыл сайынғы халықаралық акция. Оның мақсаты - климаттың өзгеруі, табиғи ресурстарды ұтымды пайдалану және қоршаған ортаны қорғау мәселелеріне көпшіліктің назарын аудару.

Дәстүр бойынша, акция аясында бүкіл әлем бойынша миллиондаған адамдар сағат 20:30-дан 21:30-ға дейін планетаның болашағына бей-жай қарамай, шамдар мен электр құрылғыларын сөндіреді.